2013重慶馬拉松 (第15個馬拉松)
地點: 重慶
路程: 全程馬拉松 (42.2195km)
個人時間: 3:48:02
起步時間: 08:30
天氣: 以為天暗好跑, 點知名副其實中國溶爐

每次出外跑完比賽,返嚟都會有朋友問 “好唔好玩?” , 一班志同道合既朋友一齊外遊吃喝玩樂,那有唔好玩之理呢? 如果有朋友想經經濟濟出外跑的話, 除廈門,台灣之外, 我會介紹呢個俾大家. 有機會的話可能我都會去多一次.

又每一次返嚟之後,都會有朋友問 “點呀?滿唔滿意成績呀?” , 如果以時間計, 比PB慢10分鐘應該算係好差既成績, 但若以享受過程計, 應該有90分以上.

決定報名去跑, 純粹貪機票平, 1200港紙搞掂, 一開始已無打算做咩成績, 純粹希望揸相機邊跑邊影遊長江. 本打算3月開始休息, 因為貪玩關係最終渣打之後仲報咗揹水一戰,LANTAU15及重慶全馬. 玩完上星期既Lantau之後, 雙腳一直好攰無力, 身體狀態更加講俾我知 “唔好妄想做時間喇! 影吓相算吧啦!

賽前俾咗個要求俾自己, 就係輕鬆跑唔睇時間, 今次我成功做到喇! 一次錶都無睇! 由於比賽唔算大型, 只有五千幾人跑全馬, 上線位置緊貼係黑人高手之後, 一秒鐘既上線時間, 跑全馬都係第一次.

沿途氣氛都算唔錯, 自己就一路跑一路影相, 第一次帶DC影足全程, 整體都算係輕鬆的, 只係跑咗個幾鐘後開始出太陽, 果然係中國有名已溶爐之地, 繼4個月前台馬之後, 又一次皓熱中比賽, 好在對無能力做時間既我無咩影響. 比賽去到34Km打後, 體力開始下降, 到38km便出現雙膝及左腳背痛情況, 真係有諗過行埋果4km算數, 後返去都唔使4.5小時, 無謂整傷自己吖! 但一諗到仲有3-4K都行同放棄無咩分別啫! 於是決定慢慢跑返終點, 最後200想衝少少腳背已即時大痛一吓, 呢一嘢真係警告我係時候要休息喇!

比賽之後遊玩洪崖洞, 十八梯及磁器口, 都好有當地特色, 短短2.5日既行程非常精彩, 多謝同行既朋友一齊砲製出一個精彩既行程.