休息咗四個星期, 康復得七七八八, 再踩車四個星期, 前後八個星期內, 棄賽四個, 如果呢個比賽都跑唔到, 真係損失好大! 而且比賽仲陸續有來... 所以前幾日試jog, 第一次頂到 4K咁多, 第二日再試, 頂到5K, 心諗星期日個比賽慢慢走點都番到嚟! 所以目標大約係50~55。

一早去到地鐵站, 已經見到唔少跑手, 同跑渣馬果日有啲似... 去到灣仔站, 仲墟埳, 天橋入口塞晒跑手! 好彩大家都好有秩序, 人雖然多, 但唔駛10分鐘, 去到灣仔運動場, 貯物, 好暢順, 仲有少少時間可以熱身, 條腰似乎好聽話, 反而對腳仲係提唔起, 好緊! 都係順住跑, 跑到幾多得幾多! 慢jog到起點, 發覺已經人山人海, 同渣馬差唔多! 等咗半個鐘, 終於開跑!

但周圍仲整緊路, 賽道唔係咁平, 大家都好小心睇路, 但响彎位已經見到有跑手扑低, 工作人員嗱嗱聲呼籲大家小心, 有膊! 其實頭果K, 真係快唔到, 周圍都係人! 上馬師道天橋收窄咗仲迫, 差啲絆到其他跑手, 好彩大家無事! 轉入駱克道, 先至鬆番少少, 可以提速! 頭1K用時5'1X, 若果keep 到呢pacing 跑番嚟, 50~55應該無問題, 而且狀態仲响度, 條腰無抗議, 對腳又鬆番少少!

其實只係得2K响市區, 仲要轉嚟轉去, 又要上落兩條天橋, 好難做到時間! 轉入東區走廊, 要逆風跑, 大家都要出多咗力, 咁後半程就辛苦啦!

大約4K位, 已經見到頭車番轉頭, 紀嘉X一馬當先, 真係好快! 但自己已經氣喘如牛, 幾個月無操練, 真係見底, 長跑果然呃唔到人! 好快去到轉折位, 用時26'1X", 如果唔跌速, 52分應該可以番到嚟!

雖然轉折之後, 變咗順風跑, 但前半程消耗太多, 後半程真係出唔到力, 跑得好辛苦! 去到8K位, 真係當黑, 俾前車絆到, 結果人仰馬翻, 碌咗落地, 大字瞓咗响度, 後面跑手真係好熱心, 走晒上嚟扶起我... 我坐响度都講咗無事, 擦損啫, 大家繼續跑, 我抖一陣就得啦.. 但有一位女跑手似乎好緊張, 唔放心, 仲走番轉頭搵工作人員, 我打晒手勢話唔駛... 佢真係拖咗個工作人員跑過嚟! 我自己檢查傷勢, 只係手﹑腳擦損, 無拗柴, 仲跑得! 所以都無等工作人員埋嚟, 自己彈番起身繼續跑, 都仍然聽到識同唔識嘅跑手慰問, 真有人情味! 本來以為扑一扑, 會損失好多時間, 但原來只係半分鐘, 影响唔大!

最後1K, 又要上番馬師道天橋, 唔少跑手都要做步兵, 10K都要行, 渣馬最後嚟到呢度, 點可能唔駛行?

結果用時50'XX", 後半程竟然仲快咗? 真係匪夷所思! 原來個轉折位唔係5K位, 而且終點位又前咗... 無操三個月, 居然可以走到呢個時間, 收貨! 不過, 都聽到唔少聲音話賽道長咗, 我都有同感!

第一次可以响市區攪10K賽, 值得推廣, 而且同渣馬比較, 對交通影响輕微。大會已經响10:00 陸續解封, 10點前對銅鑼灣區影响有限, 邊有人咁早去shopping呢!