今朝一行12人分兩批出發, 去澳門樂善跑, 因為今年訂嘅航班稍遲, 所以搭咗一班較遲嘅穿梭巴士! 去到起點已經9:10... 換埋衫﹑貯物, 得番5﹑6分鐘熱身, 嗱嗱聲上線, 等起步, 真係好趕!

等埋嘉賓剪綵, 差唔多9:35先至起跑... 本來天文台話今日天陰﹑間中有陽光... 點知係又熱又曬, 大家都跑得幾辛苦! 每個水站都要拎兩杯水, 一杯飲﹑一杯淋頭散熱!

頭段已經跑得頗辛苦, 不過第1K配速唔慢~4'0X", 500米上下昌兄已經界咗上嚟, 仲越走越快... 咁走法應該好有機會!

頭4K都走得好順下, 狀態仲响度... 但响5﹑6K唔知踼到乜野, 無嗱嗱仆親, 成個人瞓低... 好彩仲企得番起身, 檢視傷勢, 只係三處地方擦損咗, 以為無乜大碍... 但一起跑, 右腳掌超痛... 以為只係筋腱拉傷, 跑一陣鬆下就無事... 但跑咗1K, 都係痛! 仲有10K, 點算? 諗過轉左走short cut, 去環塘果個位返番起點收工... 不過收收油之後, 再試下腳踭落地, 似乎有啲用, 無咁痛! 所以試下繼續走落去!

不過咁走法, 頭5名應該無望, 不如諗下頭10位, 拎番個背囊當安慰獎! 响7﹑8K位, 強兄又界上嚟, 真係好強, 如果keep住走番去, 應該响頭5名!! 但走多幾K, 仲响射程內, 大家相差幾十米... 最近只有十幾米! 可能出咗問題!

去到好漢坡, 已經同強兄一齊拍住走! 原來佢開始作抽, 要收慢... 大家一於海軍鬥水兵, 慢慢行上瑪祖廟... 但最後2K, 基本上全程落山(落梯級), 強兄仍作抽, 唔敢快, 所以唔等佢, 自己衝落山, 但沿途有唔少一家大細响度行山, 有跑手一路衝一路大聲嗌, 叫佢地避開... 其實呢一段勝負基本上已經分出, 大家速度差唔多, 唔駛咁博命! 費事撞親細路...

最後番嚟用時1:37'XX", 比前年1:26'XX" (舊年唔作準, 因為賽道短咗)慢咗9分鐘, 真係失禮!! 但居然都拎到第4, 同第3只係差十幾廿秒!! 有少少意外驚喜! 可能舊年大會出問題, 今年啲高手無嚟跑, 又執到死雞!!

但最難得一行10名跑友, 有一半都拎到背囊, 真係大豐收! 跑得咁辛苦, 難得嚟到澳門, 緊係要食番餐好啲... 大家嗱嗱聲飛的去食自助餐! 雖然係團購價, 每人只係$1XX, 但花款唔少! 非常抵食!