自從跑完莫斯科，對柏林已經無乜期望，因為氣溫跌到13-15°C，又落雨，雖然無莫斯科咁凍，但落雨，加上連馬未恢復，應該做唔到好時間，既然嚟到，咪有幾多食幾多。

跑完莫斯科，都只係得兩課復原跑，比賽前一日，大會攪咗個早餐跑，俾參賽跑手開心下，氣氛一流，真係聯合國咁，大家奇裝異服，非常吸晴。最開心係跑完任飲任食，飽到晏晝可以唔駛食，而且終點响奧運場館，值得嚟打卡。

食完嗱嗱聲去expo拎跑手包，原來係响舊機場，非常特別，設施無拆到，又可以打卡。由於參賽有四萬人，可以想像人流有幾多？仲要係最後一日，又要排隊入場、安檢、排隊、檢查參賽卡、排隊、打手帶、排隊、買紀念品、排隊、拎跑手包、排隊...足足攪咗個幾兩個鐘，因為尾聲關係，好多tee、風褸無晒，或者斷晒碼，朋友托買嘅tee/風褸，結果都係空手而回。雖然價錢一啲唔平，但大家都面不改容，係咁搶，柏林馬果然夠吸引力。

比賽當日，號碼布可以當車飛用，所有巴士、地鐵、火車、電車免費任搭，鼓勵大家乘搭公共交通前往起點。因為知道地鐵站離起點有距離，而且有四萬人，分4槍，會好迫人，所以7：00出門，預咗兩個多小時去起點。

地鐵人唔多，兩個站就要落車行過去，要行接近2k，無命，時間仲係早，人唔係咁多，工作人員仲佈置緊場地，所以場地指示牌唔係咁足，要周圍問工作人員點入去起步區，原來先要過安檢，貯物，再分別進入唔同起步區，我响E區，第二槍。嚟到E區，無乜人上線，時間都係早，9：25起步，仲有個幾鐘，熱身太早，不如搵個地方休息下、暖下，好彩披咗張莫斯科派嘅aluminium foil、好有用，否則實凍死。

8：25, 人越嚟越多，自己都係時候排隊去廁所、熱身...跑下跑下去咗A區，原來輪椅組响8：55分批出發，所以走咗去龍門架影相，竟然分咗好多槍，輪椅組都唔少人，跟住輪到A、B、C、D組第一槍出發，我係第二槍，要嗱嗱聲番去E區上線，嘩A至D區多人到呢，插針唔入，番到E區已經爆棚，入口塞晒人，見有跑手跨欄入去，自己又跟住跨入去，如果要容納四萬人，每個區都似乎細咗啲，歐洲人身材高大，佔位都多啲啦，應該要改善。本來有跑友都係呢區，依家人頭湧湧，一個都見唔到，唯有開跑後再搵。

9：15、第一槍鳴槍，第一浪首先出發，我地係第二浪，慢慢上去龍門架等第二槍，本來遠遠仲見到330pacer，郁咗之後，已經見唔到，無得跟，食自己。9：25、第二槍鳴槍，都係郁得慢，要分幾鐘先至過龍門架，大家立即加速，其他跑手配速一啲唔慢，俾人𠝹到一頸血，佢地可能要追330pacer、然後跟車，咁會跑得舒服啲、穩陣啲，但自己無期望，都係盡人事，有幾多去幾多。但頭一、二k都係4'5x, 又唔係咁慢？不如試下跟大家配速，睇下跟唔跟到。

頭5 km 用時24:35，相當唔錯，因為中途遇上一名香港男跑手、一名內地女跑手，大家配速差唔多，又係想做330，所以三個輪流帶跑。

第10km， 用時49:35，5k時間 25:00，唔達標添，可能大家配速都係唔穩定，所以搵咗個搶眼嘅老外做目標，咁會帶番快少少。

第15km，效果唔錯，用時 1:14:27，5k時間 24:52，攞番少少時間，但大家體力開始不繼，佢兩個要食gel補充體力，睇嚟要食4包，我就睇情況，暫時仲有貨。

第20km，用時 1:39:09，5k時間 24:43，大家非常進取，暫時賺咗接近一分鐘，不過呢一分鐘係最後果200米用嚟衝線嘅，所以都係有隱憂。

半程用時 1:44:35，1.1k時間 05:27，又慢咗少少，而且大家都散散地，埋咗水站之後，仲失散咗添，唯有食自己。但跟住開始落雨，大家全身濕透，好難頂，而且周圍都係水氹，連鞋都濕透，越跑越凍，越跑越慢。

第25 km，用時 2:04:38，3.9k時間 20:03，唔達標。個男跑友响22、23k𠝹咗上嚟，原來佢一直跟住我，因為見我越跑越慢，所以上嚟帶跑，真係好，但就唔見個女跑友蹤影，可惜。响24k上下，已經跟唔到個男跑友，所以都食咗第一包gel，似乎有啲心理效用，覺得充滿力量。

第30 km，用時 2:29:29，5k時間 24:52，竟然達標。响度見番男跑友，呢個係關口位，如果頂得到，330應該無問題，同佢講，30k自己會跌速，叫佢跑自己，點知佢話跟我跑，要我帶，佢應該都係無乜貨，所以試下帶多5k睇下點。途中遇到朋友，响31k先𠝹到，不愧精英女跑手，但佢似乎都係無乜貨，講聲拜拜繼續最後11k。

第35 km，用時 2:54:43，5k時間 25:14，跌多咗添，但亦都見唔到男跑友嘅蹤影，似乎跟唔到，但自己都散散地，剩番7k，仲有35'17"走盞，但若果要keep住4'5x，似乎有難度，所以再食第二包gel，話俾自己聽充滿力量...

第40 km，用時 3:19:56，5k時間 25:13，結果都係唔達標，包gel無乜用，真係時不與我，最後2.2k，都即管試下爆番去，睇下有無奇蹟出現？依家打氣市民多咗，有少少效用，最後1k已經見到拱門，即刻開足馬力衝埋佢，過終點差啲失平衡，好彩兩位工作人員扶住。

自己㯲錶，時間3:30:32，直至大會出咗成績3:30:17， 呢2.2k時間10:22，好快，不過都係差少少先可以+330，但比預期超標，收貨啦。後來發覺唔少香港跑手都做唔到目標時間，爆到九彩，可能同天氣有關。個身濕咗，越跑越凍，自己可能適應咗莫斯科嚴寒天氣，無凍得咁緊要。

跑完行一陣，即派膠墊，暖番，沿途可以拎水、拎運動飲料。差咗唔多5分鐘，先有食物包派，都係早餐跑果啲野，都拎咗兩袋，再去到安檢位，收晶片，先至離開會場，再行多20分鐘，到達地鐵站，路程相當漫長。番到酒店，今次唔駛浸浴，熱水花灑都OK，無莫斯科果次咁慘。

傳聞柏林係超快賽道，所以今次比基利做咗世界第二快時間出嚟，2：01：xx，只係比第一慢3秒....但自己覺得呢條賽道太多彎，有啲係90度添，有啲賽道仲好窄，得兩條行車道，要搶位。路面唔平，周圍都係水氹，要打醒十二分精神。又多市民橫越賽道，連BB車、單車都有,好危險。最乞人憎係跑手相當粗魯，出踭、推人、勾腳、濺水、躡位，仲危險，加上大會水站唔夠長，一百公尺都無，仲係用膠杯，踩上去卜卜聲，隨時跣親、吉親。

歐洲呢兩個馬拉松，都係水戰，又凍又大風，感覺唔好，即使行景點，都間中會落雨，難免會影響心情，但至少見識過所謂大賽，會唔會再嚟跑？都係果句，聞名不如見面，感覺一啲唔好，唔會再嚟。