2024 東京馬拉松 3:27:56

東京馬拉松係六大馬拉松其中之一而地點又係最鍾意既日本，所以一直都好想跑一次。可惜多次落選之下唯有選擇捐錢直接取得出賽資格，但非常巧合地2020就係肺炎剛剛開始之時，東京馬拉松亦因為咁而宣佈取消。剛移住東京未能習慣寒冷天氣，寒冬練習不足既關係，比賽取消對當時既我黎講係有鬆一口氣既感覺，亦都估唔到最後我要2024先用當時報名既資格。

可能係東京住左差不多五年既關係，我有少少想係東京馬拉松破330，所以比賽前一兩個月已經專登跟住比賽賽道去練習。比賽賽道經過既地方包括屋企附近既飯田橋外堀通、多年前已經跑到好熟既新宿、Seaman平時去練習既studio所處既淺草、仲有東京鐵塔芝公園、日比谷、銀座呢啲地方，平時去行街同跑步練習已經經過好多好多次，所以今次比賽或多或少對我係有特別意義。

話咁快就到左比賽當日，天朗氣清溫度3-14度，係非常適合跑馬拉松的溫度(終於唔駛做雨神)。東馬俾我既感覺係佢並唔係一般既日本馬拉松，而係一場國際盛事，如果想體驗日本馬拉松既話東馬未必係一場好選擇。

起跑既位置比較後，大約行左12分鐘先開始起跑，太多人既關係頭10K係慢過我目標時間(00:50:05)，10K之後我就出力狂追，事前去視察賽道真係有少少幫助，因為可以知道大約有咩困難既位同可以加速既位，半程位置終於追過目標時間(01:44:45)。過左一半並沒有上次神戶馬既疲倦感，感覺非常良好，半程之後既10K係蔵前去門前仲町，冇咩起伏加上冇咩轉彎位，係可以加速既路段，心諗依家唔出全力仲等幾時，30K既時候已經有大約有分半鐘buffer係手(02:28:25)，剩番既12K幾唔駛太快都應該可以達標，個心都定左少少。

大約30-32K水天宮附近終於第一次見到前往打氣既老婆，事後佢話我跑既時間同之前講既唔同，有好幾次未去到約好既地方我已經走左🙈，之後就到左全馬最後既難關，平時練習都好少跑多過30K，會唔會抽筋都係未知之數。可能平時練習既時候又要避路人又要避單車，比賽既今日可以盡情咁跑，最後10K竟然係跑最快既10K，40K既時間有少少出乎意料(03:17:24)，呢個位得番2K多少少，就算抽筋我都有信心攪得掂330，41K位再見到老婆一次，之後就輕鬆跑埋丸之內既1K就衝線了，最終時間係03:27:56，最初預計破PB我已經好開心了，估唔到最後真係可以係東京破埋多年既心願330。